眼藥水種類多 咩眼藥水易傷眼角膜?

眼藥水種類多 咩眼藥水易傷眼角膜?

眼藥水係市面上好容易就買到，有人會將眼藥水當旅行手信送俾人，又或市民自行購買眼藥水使用，但面對住琳琅满目嘅眼藥水，你又識唔識揀？ 原來選購眼藥水要注意其種類、成分等，避免購買唔合適自己嘅眼藥水。

用於抗敏、潤眼

　　可以係坊間購買到嘅眼藥水主要分為兩種，其一係抗敏感嘅眼藥水，抗敏感眼藥水成分主要是抗組織胺藥、 肥大細胞穩定劑及血管收縮劑，主要針對舒緩眼睛過敏徵狀，例如眼睛痕癢、紅腫、流眼水等等，亦有助眼睛內血管收縮，舒緩眼睛紅筋。

其二係有潤眼功用嘅眼藥水，稱為人工淚水。人工淚水以滋潤、補充雙眼的水分為主，當中包含了其他成分，最為常見的例如透明質酸，但一般不具藥效。

如果係含有類固醇、抗生素或針對指定疾病所使用嘅眼藥水，必須經由醫生處方。

防腐劑傷眼角膜

　　要注意含有防腐劑成分嘅人工淚液，加入防腐劑眼藥水為能防止眼藥水受細菌污染，保存期約1個月，雖然含防腐劑嘅眼藥水唔會對眼睛健康有直接影響，但如果長時間經常使用，會令防腐劑累積，長遠可能令眼睛產生敏感反應，角膜更乾澀，甚至嚴重眼角膜有機會受損。特別係佩戴隱形眼鏡嘅人，隱形眼鏡會吸收更多眼藥水成分，令眼睛更容易出現以上徵狀。　　

部分不含防腐劑眼藥水，其瓶子有特別設計，加入濾膜，以阻隔細菌進入，但一般開封後只能存放約三個月時間。但即使沒有藥性的人工淚液，也不應胡亂使用，長前使用容易造成對其依賴，一但停用症狀比起之前會更明顯。

類固醇眼藥水 長用招青光眼

　　另一種係含類固醇的眼藥水，必須由醫生處方，唔能夠自行選用。曾有個患濕疹嘅兒童，雙眼亦敏感痕癢，家長自行為子女購買含類固醇眼藥水使用，經9個月後，出現副作用，發現兒童患有青光眼，視力受損，需要用治療青光眼嘅藥物。類固醇長期使用會增加眼壓，眼壓高會壓迫神經線，影響視力。

注意期限及儲存

　　使用任何眼藥水前都應睇清楚包裝上嘅使用方法、成分、有效日期，部分眼藥水開封一個月後，或三個月即使未用完都要棄置，如果使用了過期嘅眼藥水，有機會令眼藥水效用減低，更有可能受細菌感染，後果非常嚴重。

一般眼藥水只需要放係室溫環境，約攝氏20度就得，但要避免陽光照射，除非有特別指引，需放進雪櫃內。

紓緩眼乾蒸氣眼膜定眼藥水好？

　　長時間使用電子產品，又或雙眼注視近距離物件時，睫狀肌收緊，時間一長就會疲倦，過分專注亦會令眨眼次數減少，眼睛會疲勞、乾澀或出紅筋等情況，其實又可以唔洗買眼藥水，可以試下用蒸氣眼膜，溫度唔超過40℃，敷上十幾分鐘，可改善眼睛疲倦，又可放鬆眼瞼毛孔，令油脂分泌暢通，有助避免淚水過度揮發而眼乾，但要注意眼膜嘅物料，會唔會容易引致皮膚敏感。或者用熱毛巾都得。